ARON malikayan nga magdasok sa mga tawo ang mga buhatan sa Land Transportation Office (LTO) sa nasod, gilugwayan niini ang validity sa registration sa mga sakyanan.

Sa iyang memorandum, si Assistant Secretary Edgar Galvante niingon nga kini gitumong aron masunod ang mga health protocol, labina sa social distancing, taliwa sa padayong hulga sa coronavirus disease (Covid-19) sa nasod.

Matod ni Galvante nga kinanahanglan kapanalipdan ang panglawas sa publiko hinungdan nga iyang gilugwayan ang validity sa ingon dunay igong panahon sa pag-renew ang mga tag-iya.

Sa mga sakyanan, kansang plate numbers nagkatapusan og 6, 7, 8, gilugwayan kini hangtod sa Oktubre 30, 2020.Ang 6 niadto ra untang Hunyo, ang 7 sa Hulyo samtang 8 sa Agusto.

Sa mga plaka nga dunay katapusang 9 ug 0 sa Disyembre 31, 2020.

Tungod sa extension, way bayran nga surcharge ug penalty ang mga tag-iya sa sakyanan. (REV)