GISUGDAN na pagpaubos sa libre nga swab test ang mga vendor sa dakbayan sa Lapu-Lapu sugod niadtong, Lunes, Oktubre 19, 2020.

Tulo ka mga adlaw ang pagpahigayon sa swab test base sa kamandoan ni Lapu-Lapu City Mayor Junard “Ahong” Chan.

Target sa swab test ang 2,500 ka mga vendor sa dakbayan, di lang sa merkado publiko kun di lakip na ang mga vendor sa mga satellite market sa kabarangayan.

Gawas kanila, ipaubos usab sa swab test ang mga sakop sa City Traffic Management System (CTMS) sa Siyudad.

Gituyo kini maong mga lakang, sumala ni Chan, aron masiguro ang kaluwasan sa tanan lakip na ang mamalitay, gikan sa hulga sa coronavirus disease (Covid-19).

“Sa samang higayon, magsiguro pud kini nga nga luwas sila nga mouli sa ilang tagsa-tagsa ka pamilya kay lain-laing indibidwal ilang kaatubang adlaw-adlaw,” matod ni Chan.

Si Grace Mary Carungay, epidemiological surveillance unit officer sa Kagamhanan, nibutyag nga sa unang adlaw sa swab test, moabot sa 762 ka mga vendor ang nidagsa sa Hoops Dome sa Barangay Gun-ob samtang sa ikaduhang adlaw moabot usab og kapin 700 gihapon.

Mas daghan ug dali nga misanong ang vendors sa swab test karon itandi sa mga drayber niadtong duha ka semana ang nakalabay.

Sumala ni Carugay nga tungod niini, sa iyang tan-aw molapas sila og 2,500 nga target.

Ang mga vendor nga magnegatibo sa swab test hatagan usab og certificate nga siya Covid-free aron paghatag og kasigurohan sa mamalitay unya sa mga merkado sa dakbayan.

“Maayo gyud ni kay karon nga gi open na nato ang atong tourism, daghan na gyud ang tawo nga mobisita sa atong dakbayan. Mao ato gayud sila i-assured nga Covid-free atoang mga vendor,” matod ni Carungay. (GCM)