CANADIAN national gipasakaan og kasong estafa sa usa ka hotel sa Brgy. Gun-ob, Dakbayan sa Lapu-Lapu human wa makabayad sa iyang bayranan sa hotel diin siya giingong miestar.

Mao kini ang gipahibawo ni Police Chief Master Sergeant Joseph Andrin, desk officer sa Police Station 3 sa Lapu-Lapu City Police Office (LCPO).

Matod ni Andrin nga nasikop si Tony Anderson, 41, giingong way trabaho niadtong Oktubre 10 sa alas 3:30 sa hapon.

Si Erwin Clavano, 57, head security sa hotel diin mag-estar si Anderson, maoy ni-turnover sa langyaw ngadto sa police station human giingong nagdumili pagbayad sa iyang bayranan sa hotel.

Wa hinuon malatid sa blotter sa Police Station 3 sa LCPO pila ka adlaw nag-estar si Anderson sa hotel ug pila usab ang iyang bayranan sumala pa ni Andrin.

Base sa pakisusi sa kapulisan, nasuta nga dugay na nga modus ni Anderson ang pag-estar og mga hotel apan di mobayad inig checkout.

Human masayod sa hitabo, ubay-ubay nga mga hotel sa dakbayan sa Sugbo ug Mandaue nakig-alayon gilayon sa Police Station 3 aron ikompirmar nga aduna usab kini sumbong gikan kanaila kaniadto sa ubang police station. Di hinuon makasiguro si Andrin kon nagpadayon pa ba ang maong mga kaso batok kang Anderson.

“Daghan nanawag nato diri nga in-ani gyud ni iya style diay sa uban hotel sad nga mo-estar unya balhin nasad laing hotel pero dili mobayad,” matod ni Andrin. (GCM)