GIAWHAG sa kadagkoan sa Vicente Sotto Memorial Medical Center (VSMMC) ang mga pamilya sa ilang mga pasyente nga di na magdala og daghang watchers ug bisita sa tambalanan.

Giklaro sa administrasyon sa VSMMC nga sugod Hunyo 9 pa lang, ila nang gipatuman ang “no watchers and visitors policy” sa ilang tambalanan aron malikayan ang pagkatap pa sa Sars-CoV-2, nagdala sa coronavirus disease (Covid-19).

Matod ni Atty. Rey Cris Panugaling, pangu sa Information, Communications, and Strategy Management sa VSMMC, nga sila mismo nakugang dihang adunay daghang mga tawo gawas sa compound sa ilang tambalanan nga diha na mismo matulog ug maghuwat.

Dugang niya nga kasagaran sa maong mga tawo gikan sa lalawigan sa Sugbo, pipila lang ang gikan sa Dakbayan sa Sugbo.

Pagpasabot ni Panugaling nga ang mga pasyente sa Covid-19 di mamahimo nga anaay watcher o visitor.

Ang gitugotan lang nila nga aduna’y watcher ang anaa sa pediatrics department, senior citizens nga aduna’y chronic conditions ug sa Intensive Care Unit (ICU).

Dugang ni Panugaling nga wa sila magkuwang sa pagpahibawo sa publiko.

Sa ilang Facebook Live sa ilang official FB Page, gisige kini nila og pahibawo.

Subay usab sa Expanded Testing Guidelines base sa DOH Memorandum 2020-0258-A, lakip na ang watcher sa pasyente ang ilang gipaubos sa swab test aron masiguro nga mahibaw-an ang estado sa matag usa nga anaa sulod sa tambalanan.

Gawas niining awhag sa VSMMC nga di magdala og daghang watcher, giawhag usab nila ang watcher nga gitugotan nga dili magdala og daghang butang aron dili makahuot sa mga higdaanan sa ward.

Nakig-coordinate na ang tambalanan sa hingtungdan nga mga local government units (LGUs) sa mga tawo nga anaa na karon sa Fuente Osmeña Rotunda aron mahatagan og igong pagtagad.

Adunay kuryente sa dapit aron maka-charge sa ilang cellphones ang mao nga mga tawo aron ugaling adunay emergency. ma-contact dayon sa VSMMC.

Usa ang VSMMC sa mga tambalanan nga daghan og mga pasyente tungod kay ang mga taga dakbayan ug lalawigan sa Sugbo gipangdawat.