DUHA ka mga balay ang nangaguba human mahugno ang yuta nga gitarukan Martes pasado alas 6 sa gabii, Hulyo 28, 2020 sa sityo Larija, Barangay Kalunasan, Dakbayan sa Sugbo.

Nahitabo kini human sa pipila ka mga oras nga uwan.

Daling niresponde ang mga sakop sa Quick Response Team sa Cebu City Disaster Risk Reduction Management Office sa dapit aron pagtino sa kadaut ug wa bay naangol.

Hinuon, base sa Facebook post sa Barangay Kalunasan Public Information Office way naangol sa duha ka mga pamilyang nagpuyo sa mga balay.

Ang duha ka apektadong mga pamilya kasamtangang gibalhin sa multi purpose building sa barangay.

Gialerto usab nila ang mga lumolupyo nga magmatngon. (BBT)