SA LABING unang higayon, wa makatala ang kapulisan sa Central Visayas og bisan usa ka krimen tungod sa posibling wa paggawas sa mga tawo sa ilang balay ug presensya sa daghang mga pulis sa kadalanan nunot sa pagpatuman sa general home quarantine.

Matod ni Police Brigadier General Albert Ignatius Ferro, hepe sa Police Regional Office 7 (PRO), nga ang usa sa posibling hinungdan ang hugot nga pagpatuman sa general home quarantine kay tanang tawo naa ra sa ilang mga balay.

Lakip na niini ang kadaghan sa mga pulis nga makita sa kadalanan nga mihimog checkpoint ug istriktong pagpatuman sa curfew panahon sa kagabhion.

Iyang gihulagway nga mahitabo lang ang zero crime sa matag panahon nga moaway si Senador Manny Pacquio sa boxing ring.

“It’s just like a Pacman game wherein we have zero crime incident,” matod ni Ferro.

Matod niya nga kon ingon niini lang kanunay ang ipakita nga disiplina sa publiko, dako ang posibilidad nga malinawon ang komunidad.

Ning nagpadayon nga istriktong pagpatuman sa general home quarantine, ila nang hingusgan pa ang pag-ban sa mga ilimnong makahubog isip kabahin sa Executive Order number 53, ilabi na sa Dakbayan sa Sugbo.

Lakip sa gipanawagan sa ni Ferro sa publiko ang social distancing sa tanan aron di na mokatap pa ang Covid 19.

Online Presscon

Aron di na magtapok ang mga sakop sa media, himuon nalang niya sa online ang press conference ug tubagon niya ang mga pangutana nga dili na mag-abot sa usa ka lugar.

Samtang gidakop sa mga sakop sa Pardo police station ang usa ka motorista lakip ang angkas niini tungod kay wala motuman sa social distancing.

Ang mga nangadakpan mao silang Nenita Alleaga Tagadiad, 44, taga Barangay Linao, Siyudad sa Talisay ug Jerome Llaban Caballero, 41, taga Punta Princesa sa dakbayan sa Sugbo.

Matod ni Police Major John Kareen Escober, hepe sa Pardo Police Station, nga nagpahigayon sa ilang checkpoint alas 9 sa buntag Marso 24 sa dalan N. Bacalso, Barangay Bulacao, ilang napara ang duha. (AYB)