Drugas ang gitan-aw sa kapulisan nga posibling motibo sa pagpusil-patay sa usa ka lalaki sa dalan M. Velez, Barangay Guadalupe, dakbayan sa Sugbo, alas 11:20 sa gabii sa Dominggo, Nobiyembre 12, 2023.

Si Georsua Geraldine Labiste, 53, minyo, nagpuyo sa Abellana Extension, Brgy. Guadalupe, dakba­yan sa Sugbo, gideklarar nga dead on arrival (DOA) sa Cebu City Me­dical Center (CCMC).

Ang biktima nakaangkon og samad pinusilan sa ulo.

Si Police Master Sgt. Eric Arnido, imbestigador sa Guadalupe Police Station nga nahinabi sa Superbalita Cebu, nagkanayon nga ang biktima nag-estambay sa dapit sulod sa iyang multicab dihang niabot ang mga mamumuno dayon nipusil sa bikitima.

Ang mga residente sa lugar nakadungog og sunodsunod nga buto sa armas ug sa ilang pagsusi, patay na nga nakaplagan ang biktima su’d sa iyang multicab.

Nakuha sa sa kapulisan ang duha ka mga kabhang sa bala sa kalibre .45 nga pistola.

Sumala ni Arnido, dunay CCTV sa lugar nga ilang sususihon ug dunay nakuha nga cellphone sa biktima apan dili pa nila maabli tungod sa password niini.

Ang asawa ni Georsua nibutyag nga ang biktima buotan apan gikataho’ng tiggamitan og ilegal nga drugas.