TULO ka Sugboanong runners ang morepresentar sa nasod alang sa Laguna Phuket Marathon 2019 nga ipahigayon karong Dominggo, Hunyo 9 sa Thailand.

Ang dekalidad nga long distance runners sa Sugbo nga sila si Prince Joey Lee, Azlan Pagay ug Ruffa Sorongon miabot na sa Thailand kagahapon kauban ang ubang mga sakop sa 7-Eleven Team.

Si Lee modagan sa 21-kilometer distance samtang sila si Pagay ug Sorongon sa 42K category.

Ang 7-Eleven Team gilangkuban og 15 ka runners gikan sa nagkadaiyang mga lugar sa Pilipinas nga mao ang mga ningpatigbabaw sa 7-Eleven Run Series nga dungan nga gipahigayon sa Manila, Cebu ug Davao niadtong Pebrero.

Naka-qualify sab unta sa Cebu event si Olympian Mary Joy Tabal apan dili kini makaapil sa Phuket Marathon.

Kasamtangang nagtutok si Tabal sa iyang pagpangandam alang sa Southeast Asian (Sea) Games nga ipahigayon karong Nobiyembre 30 hangtod Disyembre 11 dinhi sa nasod. (RSC)