GIPAMATUD-AN sa beteranong Cebuano bowler nga si Cerge Go nga numero ra ang pangidaron pinaagi sa paglangkat sa first Philippine Senior Bowler-Cebu Chapter (PSBC) Bowler of the Year title sa miaging adlaw sa Gaisano Bowlingplex sa Banilad, Cebu City.

Taliwala sa iyang pangidaron nga 83, gipagawas ni Go nga aduna gihapon siya’y ikabuga ug iyang gipakaging si Lolong Uy sa championship game.

Dili lalim kining maong tahas ni Go gumikan kay nakasulod si Uy sa finals nga nakabawon og twice-to-beat nga bintaha.

Gibuntog ni Go si uy sa unang duwa, 217-184, aron pagpugos og deciding game diin midaog na sab si Go, 197-185.

Sa kalampusan, si Go nakabulsa og P15,000.

Si Go nagduwa og bowling sulod na sa lima ka mga dekada ug maoy labing edaran sa PSBC.

Isip 2nd placer, si Uy nakadawat og P5,000.

Ang tanang mingdaog sa torneyo nakadawat sab og bowling shirt gikan kang legendary bowler ug four-time world champion Bong Coo.

Ang PSBC gilangkuban og bowlers nga nag-edad og 55 anyos o pataas.

“It was very fulfilling year for us. We hope in the coming years more senior bowlers will join. The PSBC also hope to make a program for the youth development thru free coaching and development trainings,” matod ni outgoing president Edgar “Egay” Alqueza. (RSC)