MIHAGPAT na usab og laing gold ang Cebuanang bilyarista nga si Rubilen Amit.

Human modominar sa 9-ball event, si Amit uban ni Chezka Centeno ang yanong mipugnit og kadaugan batok sa panagparis sa Indonesian nga si Fathrah Masum ug Nony Andilah, 7-0, aron labnihon ang gold medal sa women’s 10-ball doubles sa 30th Southeast Asian Games sa Manila Hotel niadtong Martes, Disyembre 10.

Wa moagi og kakulba ang kadaugan sa duha sanglit wa gyuy porsiyento nga nakahatag og pagpanghudlat ang Indonesian. Kini maoy unang gold medal sa women’s doubles category sa SEA Games.

Sama kang Amit, si Centeno aduna na usay duha ka gold medal sanglit iya man usab nga napukan si Amit sa 10-ball singles.

Apan sa kinatibuk-an, ang Pilipinas mihagpat og upat ka gold medal sa billiards ug snooker aron angkunon ang overall championships sa maong discipline. Si Dennis Orcollo mao usab ang naka-gold sa men’s 10-ball.

Si Amit lumad nga taga dakbayan sa Mandaue, apan didto na sa Kaulohan nagbasehan. (JBM)