Pakyas ang Filipino boxer Jerwin Ancajas sa iyang tinguha nga ilogon pagbalik ang International Boxing Federation super-flyweight nga titulo gikan kang Fernando Martinez.

Napilde si Ancajas sa kamot ni Martinez sa ikaduhang higayon pinaagi sa unanimous decision kagahapon didto sa Carlson, California.

Ang tulo ka judges pulos mipabor sa Argentine sa iskor nga 119-109, 118-110, 118-110.

Niadtong Pebrero, gipilde ni Martinez si Ancajas ug nailog ang IBF super-flyweight nga bakos.

“This was about validating the first fight. I trained very hard for this fight,” batbat sa 31-anyos nga si Martinez, kinsa nagpabiling walay pilde sa rekord nga 15-0 ubanan sa 8 KOs.

Samtang ang 30-anyos nga taga Panabo, Davao del Norte nga si Ancajas nasugamak sa iyang unang sunodsunod nga kapildehan sa iyang pro boxing career. Ang iyang rekord nahagsa ngadto sa 33-3-2 ug 22 KOs.