GIPABUHAGAY sa bag-ong coach sa Los Angeles Lakers nga si Frank Vogel nga gikinahanglan ang panaghiusa sa ilang puwersa alang sa iyang tinguha nga makabangon ang Lakers sa unom ka sunodsunod nga mga tuig nga kapakyasan.

Si Vogel, kinsa maoy napili nga hulip kang Luke Walton, miabot sa kampo sa Lakers niadtong panahon sa makapakurat nga pagbiya ni basketball legend Magic Johnson isip executive sa team.

Ning bag-ubay lang, gibutyag ni Johnson nga ang pagpanglibak maoy hinungdan nga mibiya siya sa iyang katungdanan.

Si Vogel, 45, nagplano nga ipatuman ang panaghiusa sa ilang organisasyon gikan sa front office ngadto sa coaching ug playing staff.

“We need to build togetherness with our organization,” matod ni Vogel, kinsa kanhi coach sa Indiana Pacers ug Orlando Magic.

“I don’t just mean with the 17 guys that are going to be in uniform. I’m talking about organizational togetherness. Starting with ownership to the front office to the coaching staff, to the players to the trainers, the business side.”

Gipasabot ni Vogel nga pinaagi sa panaghiusa, dili lisod kab-uton ang ilang tinguha nga mahimo pagbalik nga usa ka title contender. (AFP, ESL)