IPAGAWAS ang kapabilidad sa mga batan-on pinaagi sa paugnat sa kusog maoy tinguha sa bag-ong natukod nga running group sa Sugbo nga mao ang Team Kuya Running sa ilang pag-promote og healthy lifestyle sa kabatan-unan.

Usa man tuod ka individual sport ang pagdagan apan nagtuo ang grupo nga mas makalingaw kini kon daghan ang dungan nga managan.

Ang TKR, nga gilangkuban og runners gikan sa Cebu City Sports Center, andam modawat og bag-ong mga miyembro nga aduna hilig sa pagdagan.

Ang TKR giporma ni freelance photographer ug communication student John Velez mga lima na ka buwan ang nakalabay.

Tinguha sa TKR nga i-promote ang pagdagan isip usa ka hobby ug stress reliever. Matod ni Velez nga sa kasamtangan, aduna sila’y 21 ka mga miyembro nga nag-edad og 15 ngadto sa 30 anyos.

Hinuon kasamtangan natanggong ang kalihukan sa grupo gumikan sa enhanced community quarantine nga gipatuman sa gobiyerno isip usa ka lakang sa pagpakigbatok sa makalilisang nga coronavirus disease (Covid-19). (RSC, ESL)