WALA man tuod nagduwa ang suspendidong si Calvin Abueva sa Alaska Aces apan nagsige ra gihapon kini’g dawat sa iyang suweldo, gikunhoran hinuon og mga multa.

Dili pa lang dugay, si Abueva gipahamtangan og indefinite suspension sa Alaska gumikan kay wala na kini motunga sa mga praktis sa team nga wala’y pananghid.

Gipasabot ni Alaska coach Alex Compton nga gihatag gihapon sa management ang suweldo ni Abueva gumikan kay aduna kini pamilya nga gibuhi.

“He’s got a family. This whole time, he’s been getting his salary with a fine,” matod ni Compton sa interbyu sa Spin.ph.

“The amount won’t be disclosed. That’s not public business, but I know there are some concerned fans, so I’m allowed to share that.”

Si Abueva, kinsa nag-average og 10.4 puntos ug 9.4 rebounds sa nagpadayong Philippine Basketball Association (PBA) Commissioner’s Cup, wala na nakapakita’g aksyon sa miaging lima ka mga duwa sa Aces.

Mingdang ang Aces sa nag-una nilang tulo ka mga tahas nga wala ang “The Beast” apan nasundan kini og duha ka sunodsunod nga kapildihan lakip na niini ang makauwaw nga 105-86 nga dominasyon sa Barangay Ginebra Gin Kings niadto lang Dominggo.

Wala pa’y nasayod kon kanus-a ilibkas sa Alaska ang ilang pagsuspenso kang Abueva.

Sa kasamtangan, si Abueva miduwa sa Gilas Pilipinas alang sa umaabot nga third window sa Fiba World Cup Asia qualifer. (ESL)