GIPATAPSINGAN sa Kyrie Dave ang Bogo City LGU, 73-71, sa nagpadayon nga Borbon Inter-commercial basketball tournament nga gipahigayon sa miaging gabii sa Borbon Sports Complex sa lungsod sa Borbon, Cebu.

Si Steve Castro maoy nahimong mahait nga hinagiban sa Kyrie Dave human kini mipabaha og 33 puntos lakip na niini ang mga bayanihong itsa sa himatyong minutos sa panag-engkuwentro.

Ang Bogo, nga gibituonan sa mga beteranong basketbolista sa Sugbo nga sila si Alfred Belande ug Nat Cruz, nakahatag og igong kombati gikan sa sinugdanan hangtod sa naghinapos nga bahin apan ang suwerte didto moabay sa habig sa Kyrie Dave. Ang torneyo nga gisugdan sa miaging buwan, gisuportahan ni Borbon Mayor Noel Dotillos ug vice-mayor Roy Melgo ug gidumala sa Sangguniang Kabataan Federation. (PR)