Napili si NorthPort Batang Pier guard Robert Bolick isip labing bag-ong Cignal Play-Philippine Basketball Association (PBA) Press Corps Player of the Week gumikan sa maayo niyang duwa sa miaging semana sa Commissioner’s Cup.

Si Bolick nimugna og career-high nga 44 puntos sa overtime nga kadaugan sa Batang Pier batok sa Meralco Bolts, 101-95, niadtong Septiyembre 30, 2022.

Ning maong kombati, nirehistro si Bolick og makapakurat nga 22 ka sunodsunod nga mga puntos alang sa Batang Pier gikan sa ulahing bahin sa 3rd quarter.

“Lumaban lang talaga kami. Hindi kami nag-give up. Ang sarap sa feeling,” matod pa ni Bolick human sa maong duwa.

Ang 44 puntos ni Bolick maoy labing dako nga nahimo sa usa ka local player gikan niadtong nakamugna og 45 puntos si TNT Tropang Giga guard Roger Pogoy niadtong 2020 Philippine Cup sa Clark bubble.