NAGBANGIS ang Sugboanong si Patrick Cabahug ug nagpakatap kini’g 36 puntos apan nausik ang iyang paningkamot gumikan kay napilde ang iyang team nga Brunei Pegasus batok sa Team Miller, 99-102, sa usa ka exhibition game sa Thailand niadtong Pebrero 2, 2020.

Naglabaw unta ang Pegasus, 99-95, sa hinapos nga bahin apan nakamugna ang Team Miller og upat ka sunodsunod nga mga puntos gikan nila ni Michael Clark ug kanhi magduduwa sa Philippine Basketball Association (PBA) nga si Willie Miller aron tablahon ang duwa.

Human niini, nakamugna og turnover ang Pegasus nga maoy nagduso kanila paingon sa kapildihan.

Ang Team Miller gipangulohan ni Ray Miller pinaagi sa iyang 32 puntos samtang nidugang og 29 puntos si Sameen Swint, kinsa import sa University of Southern Philippines (USPF) Panthers sa Cebu Schools Athletic Foundation Inc. (CESAFI).

Kini maoy ikaduhang exhibition game tali sa duha ka mga kampo diin mingdaog gihapon ang Team Miller sa premirong kombati.

Ang duha ka exhibition games nagsilbeng tipik sa pagpangandam sa Pegasus alang sa ilang kampanya sa Thailand Basketball Super League (TBSL) nga sugdan karong Sabado.

Si Cabahug, kinsa produkto sa University of the Visayas (UV) Baby Green Lancers, maoy usa sa tulo ka Pinoy nga imports nga gikuha sa Pegasus. (ESL)