NASUGAKOD sa Cebu City Sharks ang grabeng pagpanghudlat sa Pasig Pirates aron iposte ang 56-53 nga kadaugan nga maoy ikaupat nga sunodsunod nilang nahimo sa Maharlika Pilipinas Basketball League (MPBL) Datu Cup niadtong Sabado sa gabii sa People Center sa Bataan.

Ang Sharks ni coach Titing Manalili naglabaw og 11 puntos, 48-37, pagsugod sa 4th quarter.

Apan sa hinayhinay, ningkamang ang Pirates hangtod nga nakasikit sila pagbalik, 53-55, pinaagi sa layup ni Martin Gozum sa nahabiling 1:20 minutos.

Sa sunod nga posisyon sa bola sa Pirates, aduna pa unta sila’y kahigayunan nga matabla ang duwa dihang nahatod sa freethrow line ang ilang big man nga si Jerwin Gaco sa nahabiling walom ka mga segundos.

Nagsagol na tingali ang kulba ug ka kapoy, nasipyat ni Gaco ang iyang duha ka freethrows nga maoy nagpatiglom sa ilang poruhan.

Sa return play, napasulod ni Harold Cincoflores ang usa sa iyang duha ka freethrows aron himatyong segundos nga maoy nagselyo sa katapusang puntos sa duwa.

Ning duwaa, gipamatud-an sa Sharks nga kaya nilang mobarog nga dili magsalig og maayo sa ilang lider nga si Patrick Cabahug, kinsa wala’y nahimong puntos.

Ang kadaugan gipangulohan nila ni Rhaffy Octobre ug Jayford Rodriquez pinaagi sa ilang 10 puntos matag usa.

Maayo sab nga nakaduwa alang sa Sharks mao si Cesar Catli, kinsa niamot og siyam ka mga puntos ug Lee Yu, kinsa nitampo og walo ka mga puntos.

Ang Sharks ningsaka sa 5-8 nga rekord samtang ang Pirates nangahagsa sa 2-10 nga baraha. (ESL)