NASUGAMAK sa usa ka masakit nga kapildihan ang Cebu Sharks human kini patapsingi sa Binan City Laguna Heroes, 83-81, sa overtime sa nagpadayon nga Maharlika Pilipinas Basketball League (MPBL) Lakan Cup niadtong Hulyo 3 sa Pasig Sorts Center.

Sa kapildihan, nahagsa ang Sharks ni coach Norberto "Titing" Manalili ngadto sa 2-2 nga baraha.

Human mabiyai og otso puntos sa sayong bahin sa fourth quarter, ang Sharks pinaagi nila ni Patrick Cabahug ug Raffy Oktobre mihagsa og dakong rally nga nakapasikit sa duwa.

Ang duha ka free throws ni Victor Nunez sa nahabiling neube segundos sa regulation period maoy naghatod sa overtime, 73-73.

Hugot nga kombati ang masaksihan sa overtime apan ang floater ni Allan Mangahas sa nahabiling sais segundos maoy nagbuak sa 81-81 nga panagtabla ug sa samang higayon maoy nagwagtang sa paglaom sa Sharks.

Nangulo sa Sharks ang three-point specialist nga si Patrick Cabahug nga may 20 ug nagkumboya usab sila si Oktobre ug William McAloney og 35 puntos. (JBM)