GIHULAGWAY sa beteranong Filipino boxing analyst nga si Atty. Ed Tolentino ang sunod nga challenger ni International Boxing Federation (IBF) super flyweight champion Jerwin Ancajas nga sama og abilidad sa fictional Hollywood character nga si Rocky Balboa.

Gitumbok mao si Argentine Fernando Daniel Martinez, kinsa mosuway pag-ilog sa korona ni Ancajas ugma, Pebrero 27, 2022 (RP time) sa Cosmopolitan sa Las Vegas, USA.

Si Martinez, kinsa adunay 13-0, 8KOs nga rekord, usa ka kanhi Olympic boxer apan matod ni Tolentino, lahi ang estilo niini kumpara sa kasagarang Olympians.

“Usually an Olympic boxer has a grasp of good fundamentals, but this one is like a Rocky Balboa as if he did not go through the amateurs,” matod ni Tolentino nga napatik sa www.gmanews.tv.

“He is unbeaten using his reckless aggression style so it would be hard to convince him to tighten his punches.”

Si Rocky Balboa, kinsa maoy fictional nga bida sa sikat nga salida nga Rocky kaniadto, usa ka agresibong boksidor nga dili moatras sa grabeng binukbokay.