KON unsay gipakita ni CJ Perez sa miaging FIBA World Cup mao usab kini ang iyang gihimo sa nagpadayon nga PBA Governor’s Cup.

Ang no. 1 overall pick, sa makausa pa, mao na usab karon ang miangkorahi sa hugot nga kampanya sa Columbia Dyip sa playoffs nga maoy molamas sa iyang unang tuig sa liga.

Sa pito ka duwa sa miaging Oktubre, si Perez aduna nay average nga 23.6 puntos, 7.9 rebounds, 3 assists ug 2.4 steals sa dihang ang Columbia mitali og 3-4 nga baraha apan mihayag ang purohan niini alang sa quarterfinals round.

Tungod sa gipakita sa 25-anyos nga guard, si Perez maoy napiling PBA Press Corps Rookie of the Month awardee.

Iyang nalupig sila si Robert Bolick sa Northport ug Bobby Ray Parks sa Blackwater sa maong binuwan nga pasidungog.

Kini maoy iyang ikatulong Rookie of the Month sukad ang Press Corps misugod sa pagpanghatag sa maong pasidungog sa pagsugod sa season. Ang una niadtong Enero ug gisundan nianang pagka Marso.

Samtang sa laing bahin, nasugakod sa Rain or Shine Elasto Painters ang pagpanghudlat sa San Miguel Beermen sa 4th quarter aron iposte ang 91-85 nga kadaugan niadtong Sabado sa gabii Hoops Dome sa Lapu-Lapu City.

Sa kadaugan, nagpabiling buhi ang paglaom sa Elasto Painters (3-5) nga makakumpayot sa katapusang biyahe paingon sa nagkaduol nga quarter-finals.

Ang Beermen natagak sa 6-4 nga rekord ug wala na kini purohan nga makasulod sa Top 4. (JBM, ESL)