GIPANGHIMAKAK ni Doc Rivers ang hugonhugon nga interesado siyang mobiya sa Los Angeles Clippers aron maoy mo-coach sa Los Angeles Lakers.

Ang Lakers, taliwala sa paghiabot ni four-time MVP LeBron James, kasamtangang nagkagidlay sa National Basketball Association (NBA) bitbit ang 31-39 nga rekord.

Gituohan nga delikadong mataktak sa posisyon ang kasamtangang coach sa Lakers nga si Luke Walton gumikan niini.

Si Rivers usa ka suod nga higala ni Magic Johnson, Lakers president of basketball operations, hinungdan nga dili halayo ang posibilidad nga kuhaon siya ni Johnson.

Apan gipasabot ni Rivers nga dili niya bastabasta mabuhian ang iyang trabaho sa Clippers gumikan kay taas nga kontrata ang naglambigit kanila.

“I have a job and the Lakers have a coach,” pasabot ni Rivers. “Straight and upfront, I’m going to be here until Steve (Ballmer) says ‘Get out.’”

Si Ballmer maoy tag-iya sa Clippers. (AP, ESL)