Mopahigayon og libreng summer clinic grassroots program karong Abril 18, 2022 sa Barangay Day-as Sports Complex sa New Imus Road, Cebu City ang Yaw-Yan Ardigma Philippines ug Muaythai Association of the Philippines nga gipangulohan ni Master Benigno Caniga Jr..

Matod ni Master Ekin, kinsa maoy founder/CEO sa Yaw-Yan Ardigma ug MMA Cebu patron, nga kaabag niya ning maong kalihukan ang Barangay Day-as Council ug Barangay Day-as SK pinangulohan ni Capt. Freddie T. Esmas.

Asoy ni Master Ekin, kinsa usa ka konsehal sa barangay Day-as, nga usa kini sa ilang mga pamaagi aron ilikay ang ilang kabatan-unan sa paggamit og ginadiling drugas.

Gawas niini, usa sab kini ka pagpangandam alang sa umaabot nga Batang Pinoy ug Philippine National Games.

Sa laing bahin, matod ni Master Ekin nga mobalik na sab ang yaw-yan summer classes sugod karong Abril 18, sa Yaw-Yan Headquarter sa dalan Sanciangko, atbang sa University of Cebu (UC) main campus.

Alang sa dugang mga detalye, mahimong motawag sa 0943 656 8900.