MIGINTANG lang og pipila ka mga oras sa wala pa langkati sa iyang titulo si kanhi world boxing champion Filipino Jerwin Ancajas kagahapon, Pebrero 27, 2022, usa ka di inilang Pinoy ang midiboho og pangalan sa international scene sa boxing.

Kini human mikulit og surpresang unanimous decision nga kadaugan si Vincent Astrolabio batok sa two-time Olympic gold medalist ug kanhi lineal junior featherweight champion Guillermo Rigondeaux sa Dubai Marina sa Dubai, United Arab Emirates.

Ang tulo ka judges parehong mitali og 95-94 pabor kang Astrolabio, kinsa mitumba ni Rigondeaux sa ikawalo nga round.

Si Astrolabio misaka sa 17-3, 12KOs nga rekord samtang si Rigondeaux nahagbong sa 20-3, 13KOs nga baraha.

Kini maoy ikaduhang sunodsunod nga kapildihan ni Rigondeaux batok sa Pinoy fighters.

Niadtong Agusto, 2021, gipildi siya ni World Boxing Organization (WBO) bantamweight champion John Riel Casimero pinaagi sa split decision sa Carson, California.