Opisyal na nga mi-qualify sa Tokyo Olympics ang Sugboanong skateboarder nga si Margielyn Didal.

Mismong ang world governing body sa skateboarding ang nipahibawo nga ang 22 anyos nga taga Lahug, Dakbayan sa Sugbo nahilakip sa 20 ka mga individual nga ning-qualify sa women street skateboarding.

Ang kanhi pangulo sa Skateboarding and Roller Sports Association of the Philippines nga si Monty Mendigoria mikompirmar ning maong kalambuan.

Si Didal, gold medalist sa 2018 Asian Games sa Jakarta, Indonesia ug 2019 Southeast Asian Games sa Manila, maoy ika-10 nga atleta sa Pilipinas nga nakaseguro na’g puwesto sa Tokyo Olympics.

Ang mga nag-una kang Didal mao sila si gymnast Caloy Yulo, pole vaulter EJ Obiena, mga boksidor nga sila si Eumir Marcial, Carlo Paalam, Irish Magno, ug world champion Nesthy Petecio, 2016 Olympic weightlifting silver medalist Hidilyn Diaz, taekwondo jin Kurt Barbosa, ug rower Chris Nievares. (JBM)