Ang San Miguel Beermen nisandig sa ilang mga sniper aron inaton ang series human ilang gipukan ang Talk N Text Tropang Giga 114-96 sa game 6 ngadto na sa katapusang duwa sa ilang best of seven series sa 2022 PBA Philippine Cup championship.

Si Marcio Lassiter nipaarak og 22 puntos, 20 puntos ang girapido ni Simon Enciso ug ang duha nagkomboya sa 12-18 shooting sa three point arc aron sigurohon nga adunay game 7 human sila naunhan sa TNT 3-2 sa unang lima ka duwa. Ang duwa karong gabii, Septiyembre 4, ipahigayon sa Smart-Araneta Coliseum.

Ang SMB wala niluag sa ilang bakos sa second half ug nagpadayon kini paghuramentado human nisuway og dikit ang TNT 72-62 sa third quarter.

Ang Tropang Giga niduwa nga wala ang ilang number one point guard nga si Jayson Castro, kinsa nagsul-ob sa iyang uniporme apan wala niduwa gumikan sa iyang ankle injury nga iyang nakuha sa game 5.

Ang ilang bench player nga si Glenn Khobuntin wa usab nakaduwa gumikan sa MCL injury apan si Castro nagkanayon nga iyang buhaton ang tanan aron makaduwa lang siya sa game 7 karong gabii.

Ang SMB sayo nga niarangkada sa pagpangulo ni Lassiter ug Enciso kinsa nagkumboya og 9 ka tres sa first half diin ang ilang labaw niabot og 26 puntos.

Gawas kang Lassiter ug Enciso, nitabang usab sa SMB si CJ Perez sa sayong bahin sa duwa kinsa nihipos og 20 puntos.

Ang TNT gipangulohan sa Sugbuanong si Roger Pogoy, kinsa nipabuto og 31 puntos apan ang iyang paningkamot wala paigo sanglit nalimitahan sa 2 puntos si Mikey Williams, kinsa 1-of-13 shooting sa field.

Ang San Miguel wala na kaayo nagkinahanglan kang Best Player of the Conference awardee nga si JuneMar Fajardo, kinsa igo lang nihipos og 10 puntos ug 12 rebounds.

Si Fajardo ni-record og 27 puntos ug 27 ka rebounds sa ilang kadaugan sa niaging semana.

“That’s what I was waiting for, for everybody to click. Marcio is shooting well, plus Enciso, and no need for June Mar,” matod pa ni San Miguel coach Leo Austria.

Si Mo Tautuaa niabag sab og 15 puntos ug 8 rebounds samtang si Jericho Cruz nitampo og 11 puntos para sa kadaugan sa SMB.

Kon mahimong kampyon ang SMB, kini maoy ilang ika-28 nga championship trophy sa ilang prangkisa apan kon ang bolahan mao ang TNT, kini maoy ilang ika-9 nga kampyonato sa liga.