Ang parehong Filipino ug world champion sa bantamweight division nga si Nonito Donaire ug Johnriel Casimero magsukdanay sa ilang katakos alang sa unification bout karong Agusto 14, 2021 sa Dignity Health Sports Park sa Carson, California.

Si Casimero nga lumad taga Ormoc City, Leyte mao ang World Boxing Organization (WBO) champion sa 118-pound division, samtang si Donaire ang gagunit sa World Boxing Council (WBC) nga titulo human niya gipatulog si Nordine Oubaali niadtong Mayo 29.

Gikompirmar ni Sean Gibbons, ang president sa Manny Pacquiao (MP) Promotions, nga usa na ka “done deal” ang Donaire-Casimero nga away. Ang MP mao ang stable ug handler ni Casimero.

Gikatakda untang depensahan ni Casimero iyang bakos batok sa beteranong boksidor nga si Guillermo Rigondeaux sa Agusto 14. Apan miatras ang uwahi aron mahitabo ang unification fight ni Casimero ug Donaire.

Dako og makuha ang mananaog aning away kay mabutang siya sa maayong posisyon aron mahimong undisputed world champion sa bantamweight division.

Aron mahimong undisputed champion kinahanglan nga ma-unify sa boksidor ang upat ka major nga bakos nga mao ang WBO, WBC, World Boxing Association (WBA) ug International Boxing Federation (IBF).

Ang Japanese nga si Naoya Inoue mao ang naghupot sa WBA ug IBF nga titulo. Siya pud ang kampiyon sa Ring Magazine.

Sa edad nga 32-anyos anaa pa sa iyang peak si Casimero, samtang si Donaire maoy nahimong oldest bantamweight champion sa history sa boksing sa edad nga 38-anyos human niya gi KO sa fourth round si Oubaali.

Gikan pud sa usa ka impresibo nga away si Casimero diin iyang gi TKO ang Olympian nga si Duke Micah sa miaging tuig didto sa Mohigan Sun Casino.

Si Donaire adunay 41-6, 27 KOs nga rekord samtang si Casimero anaa sa 30-4, 21 KOs nga baraha.

“My team does magic. Thank you to Richard Shaefer, Rachel Donaire, PBC, TGB and Showtime. Started camp last week. Belt #2 coming soon,” post ni Donaire sa iyang Instagram account.

Samtang si Casimero mi-post sa iyang Twitter account ug duha ka Philippine flag nga nagpasabot sa umaabot nga away sa duha ka Filipino champions.