GIGAMIT sa Philippine Basketball Association (PBA) stars nga sila si JuneMar Fajardo ug Marc Pingris sa maayong pamaagi ang ilang kalingawan nga mao ang pagduwa og DOTA.

Nagkanayon si Pingris nga pinaagi sa pagduwa og DOTA, nagtinguha sila nga makatigom og P1 million aron ihatag nga donasyon ngadto sa UP Medical Foundation nga nahilakip sa frontliners sa pagbatok sa makalilisang nga coronavirus disease (Covid-19).

Ang duha ka mga magduduwa, nga dugay nang nahilig sa DOTA, nagpasiugda og esports event nga giulohan og ‘Lockdown Games’ aron makabaton og pundong pinansyal.

“Sali na. Meron na tayong magagawa, masusuportahan pa natin ang #stayhome campaign ng DOH at makakatulong pa tayo sa #frontliners,” post ni Pingris sa Instagram.

Lakip sa mga magduduwa sa PBA nga ning-apil sa Lockdown Games mao sila si Japeth Aguilar sa Barangay Ginebra Gin Kings ug Kiefer Ravena sa NLEX Road Warriors.

Matod ni Pingris nga ning puntoha, nakatigom na sila og P400,000.

“Salamat sa lahat ng sumali, nag-donate at sumusuporta,” pasalamat ni Pingris.

“Higit sa lahat, salamat sa ating nga bayani (frontlines) sa inyong #labanparasabayan. Grabe sa puso.” (ESL)