GISUBAY karon sa mga awtoridad ang personal nga panagbikil ug koneksyon sa ilegal nga drugas isip maoy motibo sa pagpusil-patay sa kanhi magduduwa sa University of San Jose Recoletos (USJ-R) Jaguars nga si Maui Huelar sa Bacolod City niadtong Abril 16, 2020.

Sa interbyu sa www.abs-cbnnews.com, nagkanayon si Bacolod City Police Office Spokesperson, Lt. Col. Ariel Pico nga posibleng adunay nasuko kang Huelar nga adunay kalambigitan sa ilegal nga drugas.

Gidakop si Huelar kaniadto sa kapulisan ug nahimo kining whistleblower.

"He also named prominent personalities in the government, in the PNP linked to illegal drugs. Prominent personalities here in Bacolod. That could be one of the reasons,” matod ni Pico.

Si Huelar, kinsa kanhi kapitan sa Barangay 35, nasikop sa usa ka buy-bust operation sa Philippine Drug Enforcement Agency (PDEA) niadtong 2016.

Nabilanggo siya human nakuhaan ug namaligya og ilegal nga drugas.

Misulod si Huelar sa plea bargaining ug gibuhian sa bilangguan niadtong 2018.

Sa laing bahin, si City Police Director Police Col. Henry Biñas sa mga nagnegosyo duol sa nahitabo an sa krimen nga motabang sa mga imbestigador pinaagi sa paghatag sa ilang CCTV recordings.

Nagtuo si Biñas nga kaila ra ni Huelar ang tawo nga nitawag kaniya hinungdan nga migawas siya sa gym diin nahitabo ang pagpamusil.

"Ang caller most probably in conspiracy especially in illegal drug business," asoy ni Biñas.

Si Huelar, kinsa kanhi magduduwa sa Negros Slashers sa nabungkag nga Metropolitan Basketball Association (MBA) maoy ikaduha ng barangay captain ug ikatulong barangay official sa Bacolod City nga gipatay gikan niadtong 2019. (ESL)