PADAYON ang pagmangtas ni Kevin Durant aron giyahan ang Brooklyn Nets atol sa iyang pagbalik og duwa gikan sa hamstring injury nga maoy nakapalta niya og duha ka buwan.

Si Durant nihipos og 25 puntos og 11 assists , 26 puntos ang giamot ni Joe Harris ug 11 puntos ang giabag ni Kyrie Irving samtang wala pa ang ilang ikatulo nga superstar nga si James Harden aron puhagon ang Charlotte Hornets,130-115.

Ang laing role player sa Nets nga si Landry Shamet niwaswas og 20 puntos samtang tag 10 puntos sila si Jeff Green ug Blake Griffin para sa balanse nga atake sa Brooklyn.

Ang Hornets gipangulohan ni Miles Bridges pinaagi sa iyang career high 33 points samtang 27 puntos ug 10 assists ang gipaarak ni Terry Rozier kinsa napilde og upat ka sunodsunod nga duwa.

Samtang giagak dayon ni Filipino American Jordan Clarkson ang league leading Utah Jazz atol sa unang duwa sa iyang pagbalik human siya wala nakaduwa sa niaging upat ka game gumikan sa knee injury.

Ang Jazz nipilde sa bagsik nga Indiana Pacers, 119-111 diin ang ilang star nga si Donovan Mitchell wala makahuman sa duwa gumikan sa pagkatapilok.

Si Clarkson kinsa maoy paborito nga makalabni sa 6th man of the year award nihipos og 18 puntos nga maoy iyang average.

Ang Jazz nipapas sa double digit nga labaw aron itabla ang score sa 89 ubos sa backtoback basket ni Clarkson.

Si Rudy Gobert niamot og 13 puntos ug 23 rebounds samtang 22 puntos ang nahimo ni Mitchell.

Nangulo sa pilderong Pacers mao si Domantas Sabonis kinsa nirehistro sa iyang 22 puntos ug 15 rebounds samtang 24 puntos ang giabag ni Caris Levert.

Sa laing mga duwa, gipukan sa New York Knicks ang Dallas Mavericks, 117-109, gipilde sa Portland Trail Blazers ang San Antonio Spurs 107-106, gisabyagan og tubig sa Minnesota Timberwolves ang Miami Heat, 119-111.

Gipalo-palo sa Denver Nuggets ang Houston Rockets, 128-99, gibalian og sungay sa Memphis Grizzlies ang Chicago Bulls, 126-115 ug gikawras s Toronto Raptors ang Orlando Magic, 113-102.

Gibaraw sa Philadelphia 76ers ang Los Angeles Clippers 106-103 ug nag-umido ang opensa sa Washington Wizards batok sa New Orleans Pelicans, 117-115. (PAC)