GILAKIP sa Philippine Olympic Committee (POC) ang ngalan ni pole vault Olympian EJ Obiena sa Team Philippines sa listahan nga ilang isumiter sa mga nag-organisar sa 31st Southeast Asian Games karong Mayo, 2022 sa Hanoi, Vietnam.

Sa iyang opisyal nga pamahayag, nagkanayon si POC president Abraham “Bambol” Tolentino nga apil si Obiena sa 654 ka mga Pinoy nga mga atleta nga mosuway pagdepensa sa overall title sa Pilipinas sa kompetisyon.

Apan wala kini nagpasabot nga segurado na nga makaduwa si Obiena sa kompetisyon.

Hinuon, gitataw sa POC nga buhaton nila ang tanan nga makasalmot gyud ang 26 anyos nga atleta.

“It’s both frustrating and disappointing if we don’t see EJ setting a new SEA Games record in Hanoi," matod ni Tolentino sa www.gmanews.tv.

"Logic plays a major role here for the need to include him in the SEA Games list, this is sports and he’s a national sports pride.”

Taliwala sa mga kalampusan ni Obiena, wala siya gilakip sa Philippine Athletics Track and Field Association (PATAFA) sa line-up niini gumikan sa tataw nga rason – ang panagbikil nila ni Obiena ug PATAFA president Philip Ella Juico.