Kulba dala ang kahinam ang masaksihan karong adlawa, Dominggo, Marso 6, 2022 sa dihang kapin sa 100 ka mga bikers gikan sa nagkalainlaing dapit Sugbo ug kasikbit nga mga lugar ang magtigi sa Dela Peña Daisy Academy TopTune EnduRace 2022 sa Gullas Heights and Abono Hills sa lungsod sa Minglanilla, Cebu.

Sugdan ang kalihukan sa alas 8:30 sa buntag diin ang participants gibahin ngadto sa nagkalainlaing kategoriya.

Kini mao ang 19-below, 20-29, 30-39, 40-above, female category ug hardtail.

Ang kompetisyon nga mosubay sa individual time trial (ITT) motadlas sa malisod nga dulhogon nga dalan diin gibana-banang may usa ka kilometro kapin ang gilay-on.

Si Jasun Ray Salonoy, usa sa nagpasiugda, nibutyag nga gawas sa pipila nga gikan sa Sugbo, aduna usay mga riders nga nagagikan sa Leyte ug Bohol.

Ang top three sa matag kategoriya adunay ganti nga P3,000, P2,000 ug P1,000 samtang ang 4-10 placers makaangkon usab og mga medalya. Ang registration fee nagkantidad og P800.