NAGPADAYON sa pagpakondisyon ang Sugbuanong basketbolista nga si June Mar Fajardo sa iyang unang pagbalik sa fitness gym sulod sa walo ka buwan nga rehabilitasyon sa iyang injured shin.

Gipakita ni Fajardo sa iyang official YouTube page, Ahos Gaming, ang usa ka 20-minuto nga video diin makita ang higanteng pambato sa San Miguel Beermen nga nibalik na sa gym workouts.

Ang migiya ni Fajardo mao sila San Miguel Beermen assistant coaches Boycie Zamar ug Andrew Dulahan.

Ang six-time PBA Most Valuable Player nga si Fajardo wala miuban sa Beermen sa PBA “bubble” sa Angeles City, Pampanga tungod kay nagpaaplim pa kini sa iyang angol sa tiil.

Ang Beermen naglaom nga makalangkat sa ilang ikaunom nga sunod nga kampiyonato sa PBA Philippine Cup apan mas lisod ang ilang tahas karon tungod wala ang sinaligan nga si Fajardo.

Adunay 3-2 nga record ang Beermen karon didto sa PBA “bubble.”

Aduna pay unom ka nahabiling mga duwa ang Beermen alang sa single round-robin elimination.

Sa mga miaging adlaw, gisuwayan na sab ni Fajardo ang minimal shooting sa basketball court. (RSC)