TUNGOD sa ilang natampo ug nabuhat sa Philippine basketball, hatagan og pasidungog ang Sugbuanong basketbolista nga si Ramon “El Presidente” Fernandez ug si Robert “Sonny” Jaworski sa San Miguel Corporation-Philippine Sportswriters Association (SMC-PSA) Annual Awards Night karong Marso 14, 2022, sa Diamond Hotel, Manila.

Si Fernandez ug Jaworksi maoy pambato sa Toyota franchise nga midaog og siyam ka titulo sa tuig 1975 ngadto 1983.

Apan nabalhin og laing teams ang duha og didto nagsugod ang ilang hardcourt rivalry.

Si Jaworksi mao ang nagsugod sa “Never-Say-Die” spirit sa Ginebra ug gidala ang franchise ngadto sa upat ka championships sa wa pa kini moretiro niadtong 1998.

Samtang si Fernandez nahimong usa sa mga dominante nga players sa PBA, diin midugang siya og tulo ka MVP awards sa iyang post-Toyota days ug championship titles ubos sa Tanduay ug San Miguel.

Miretiro si Fernandez nga maoy league all-time leader sa scoring, rebounding, blocked shots, free throws made ug career minutes played. Aduna siyay 19 ka PBA titles ug 4 ka MVP awards.

Si Fernandez nagpadayon pud og pagpalambo sa Philippine sports isip commissioner sa Philippine Sports Commission (PSC).