ADUNAY rekomendasyon ang International Basketball Federation (Fiba) alang sa pagbalik sa amateur basketball events taliwala sa padayong hulga sa coronavirus 2019 (Covid-19).

Ang Fiba, kansang orihinal nga pangalan mao ang Federation Internationale de Basketball Amateur, maoy basketball governing body sa tibuok kalibutan.

Nakigtambayayong ang Fiba sa World Health Organization (WHO) alang sa mga lagda nga ilang ipasunod sa dili pa sila motugot sa pagbalik sa basketball events. Sa sa ubang natad sa paugnat sa kusog, naundang ang kompetisyon sa basketball niadtong Marso dihang grabe na ang pagkuyanap sa Covid-19 sa nagkadaiyang suok sa kalibutan.

"This set of guidelines will be very beneficial for the basketball community in their return to our game," pamahayag ni Fiba secretary general Andreas Zagklis. "We all miss our sport being played and as the situation related to the Covid-19 pandemic evolves, Fiba remains committed to providing guidance for a safe environment for the 'Return to Basketball'."

Ang mga lagda gihan-ay ni Fiba Medical Commission chairman Dr. Peter Harcourt sa Australia human sa iyang pagkonsulta sa Fiba Covid-19 Medical Advisory Group (MAG), ug Fiba Medical and Players Commission.

Ang mga lagda nga ipatuman sa Fiba alang sa pagbalik sa basketball events ipadangat ngadto sa nagkadaiyang national basketball federations sa kalibutan. (ESL)