SUGBOANONG two-time world title challenger Mercito “No Mercy” Gesta makigbatok sa Mexican knockout artist Juan Antonio “El Mozo” Rodriguez karong buntag, Marso 22, sa The Avalon, Hollywood, California USA.

Atol sa weigh-in kagahapon sa buhatan ni Oscar Dela Hoya sa Golden Boy Promotions (GBP) sa Los Angeles, ang walhon nga taga Barangay Labogon, Mandaue City, Cebu apan atoa na magbasehan sa San Diego, California, yanong mikuha sa catchweight limit nga 138 pounds samtang si Rodriguez 134.6 pounds.

Ang Gesta-Rodriguez usa ka 10-round non-title fight maoy main event sa pito (7) ka paresan nga gidalit sa GBP nga isalida sa DAZN live streaming pay per view.

Si Gesta, kanhi Muay Thai fighter, adunay 32-2-2, 17KO nga baraha ug kasamtangang World Boxing Organization-NABO Lightweight champion. Si Rodriguez, sa iyang bahin, adunay 29-7, 25KO nga record.

“Knockout artist ni ang kontra ni Mercito apan malaumon ko modaug mi sa puntos, kon naay opening diha na mi mangita’g KO,” matod sa amahan ni Mercito nga si Anecito Gesta dihang nahinabi sa Superbalita Cebu sa telepono.

“Mas daghang tira, abtik ug paspas among birada karon kay sa miaging away, maninguha mi modaug aron maka away mi sa WBO# 4 contender para title eliminator. Pasalamat mi sa tanang fans sa team Gesta,” dugang ni Anecito, lumad nga taga Toong, San Remegio, Cebu.

Si Mercito makaduha mapakyas pag-ilog sa 135-lb world title apan pulos napukan pinaagi sa unanimous decision. Niadtong 2012, napildi siya ni Miguel Vazquez alang sa IBF belt.

Sa iyang ikaduhang pagsuway paglangkat sa world title niadtong 2018, gipukan na usab siya sa beteranong si Jorge Linares alang sa WBA ug WBC Diamond title.

Si Gesta ubos na karon sa pagdumala sa trainer ni Manny Pacquiao nga si Freddie Roach. (Daniel Quindao Guden, US Correspondent)