SUGBOANONG gold medalist sa 30th edition sa Southeast Asian (SEA) Games nga taga Barili nga si Daniel Lederman ang hatagan og komendasyon ug pasidunggan sa maong lungsod.

Kini maoy gibutyag ni Barili vice-mayor Julie Flores sa dihang gikahinabi sa Superbalita.

Matod ni Flores nga si Lederman, anak sa iya ra usab nga higala nga si Marites Tabanao apan naminyo og usa ka German national, lumad nga taga Poblacion, Barili.

“Dako siyang garbo sa Barili, so maghimo ta ana dayon og resolution nga mag-commend kaniya tungod sa iyang nahimo. Apil na ni sa cash incentives kon pilay atong mahatag,” nagkanayon si Flores kinsa personal usab nga mitan-aw og mga duwa sa SEA Games didto sa Kaulohan.

Dugang niya nga posibling mouli karong adlawa si Lederman sa Barili ug mogahin og pipila ka adlaw alang sa hamubong pagbakasyon. Si Lederman naka-gold sa Game of Skate men’s division, kauban sa laing Cebuana nga si Margielyn Didal kinsa mipatugbabaw usab sa women’s division. (JBM)