Mahuman na kaha ang Eastern Conference Finals o makab-ot sa Boston Celtics nga mamahimong labing unang team sa National Basketball Association nga makabangon sa 3-0 nga pagkalubong sa ila karong panagtigi tali sa Miami Heat sa balwarte sa nauwahi?

Ang Heat nasugamak sa 110-97 nga kapildihan sa Celtics sa Game 5, nga nagputol sa ilang labaw sa series sa Eastern Conference finals ngadto sa 3-2, apan ang sentro nga si Bam Adebayo niinsistir nga ang ilang kumpiyansa wala mawagtang.

Ang Miami adunay 3-0 nga labaw sa serye sa wala pa ang duha ka sunodsunod nga kapildihan nga nagpataas sa paglaum sa usa ka wala pa mahitabo nga pagbangon nga hayan mahimo sa Celtics.

Way team nga nakadaog sa best-of-seven playoff series gikan sa 3-0 down apan ang Celtics moadto sa Miami alang sa Game Six karong buntag dala ang momentum.

Si Adebayo, kinsa maoy nangulo ug niiskor og 16 puntos samtang ang Miami star man nga si Jimmy Butler napugngan sa 14 puntos, niingon nga ang Heat wala matarog sa ilang pagtuo sa sunodsunod nga kapildihan.

“Why would we lose confidence? When we started this journey, nobody believed in us. Everybody thought we were going to be out in the first round. Everybody thought we were going to be out in the second round. And now we are here one game away. For us, we’ve always had confidence, and that’s not going to go away,” padayag ni Adebayo.

Ang series daw nakontrolar sa Miami sa dihang ilang gipildi ang Boston 128-102 sa Game 3, apan napildi sab sila sa duha ka sunodsunod nga mga duwa.

Gisalikway usab ni Miami coach Erik Spoelstra ang epekto sa dayag nga pagbag-o sa momentum sa iyang koponan.

Ang Heat mosuway og langkat sa kampyonato sa ECF apan ang Celtics nagtinguha sab sa pagbaraw aron dad-on og balik ang duwa sa TD Garden sa Boston.