NAGTINGUHA karon ang Houston Rockets nga i-release ang beteranong guard nga si John Wall pinaagi sa trade.

Matod pa sa taho nga ang Houston mihimo na og lakang nga mapalig-on ang ilang lineup pinaagi sa pagkuha og batan-ong players.

Lakip sa ilang plano mao nga dili lang una nila paduwaon ang 5-time All Star ug 31-anyos nga Wall sa tibuok season aron dili marisgo ang panglawas niini.

Sa taho sa ESPN, si Wall gipaabot nga motambong sa training camp sa naghinapos nga bahin karong buwana diin iyang ikaayuda ang batan-ong guards nga sila si Kevin Porter Jr. ug Jalen Green, ang no.2 pick sa drafting karong tuiga.

Hinuon dili dali ang pag-trade ni Wall, kinsa aduna pa’y duha ka mga tuig nga nahabilin sa iyang kontrata nga nagbalor og $97 million.

Wa siya makaduwa sa tibuok 2019-2020 season tungod sa iyang achilles ug heel injuries.

Si Wall nakuha sa Rockets gikan sa Washington niadtong Disyembre, 2020 baylo kang Russel Westbrook.

Ang no.1 overall pick sa 2010 National Basketball Association (NBA) Draft nag-average og 19.1 points, 9.1 assists, 4.3 rebounds ug 1.7 steals sa 613 ka duwa sa kinatibuk-ang niyang career sa Wizards ug Rockets. (JBM)