Isip paghatag og gibug-aton sa paningkamot sa atletang mga Pinoy, gidoble ni Presidente Rodrigo Duterte ang insentibong pinansyal alang sa mga nakakuha og mga medalya sa miaging 31st Southeast Asian Games sa Hanoi, Vietnam.

Si Philippine Sports Commission (PSC) chairman William Ramirez maoy nangulo sa courtesy call sa Philippine contingent sa Malacañang niadtong Martes, Mayo 31, 2022.

“I wish you all a good life para sa ginawa ninyo sa bayan. I would like to say to all of you, maraming, maraming salamat,” batbat ni Duterte nga napatik sa www.abs-cbnnews.com..

Ang Pilipinas nakahakot og 52 ka gold, 70 ka silver ug 105 ka bronze medals aron angkunon ang ikaupat nga puwesto, labing daghan nga nahakot sa Pilipinas mga edisyon sa matag duha ka mga tuig nga kompetisyon nga gipahigayon sa gawas sa nasod.

Basi sa Republic Act 10699, ang gold medal winners sa SEAG pahalipayan og P300,000, ang silver winner kay P150,000 unya P60,000 sa bronze medalist.

Sa bonus nga gihatag ni Duterte, mahimo na kining P600,000, P300,000 ug P120,000.