LAING dakong kalihukan sa natad sa paugnat sa kusog ang nauswag gumikan sa makalilisang nga coronavirus disease (covid-19) nga ningkuyanap sa tibuok kalibutan.

Ang International Boxing Hall of Fame, nga gikatakda unta karong Hunyo ning tuiga, giuswag sa sunod nang tuig sa samang buwan.

Mao kini ang gipahibalo ni executive director Ed Brophy.

Gipasabot ni Brophy nga ang mga pasidunggan karong tuiga idungan na lang sa mga pasidunggan sa sunod tuig.

"Provide each inductee with the recognition they each so richly deserve," matod ni Brophy.

Ang Class of 2020 gipangulohan nila ni Mexican legend Juan Manuel Marquez, Bernard Hopkins ug Shane Mosley.

Ang ubang apil sa grupo mao sila si Barbara Buttrick, Christy Martin, Lucia Rijker, Frank Erne, ug Paddy Ryan.

Naapil sab ning maong grupo ang promoters nga sila si Lou DiBella, Kathy Duva and Dan Goossen, ug ang mga journalists nga sila si Bernard Fernandez ug Thomas Hauser.

Ang opisyal nga plaques sa mga sakop sa Class of 2020 i-display sa Hall of Fame sugod karong Hunyo, 2020. (ESL)