HUMAN pakaginga sa ilang heavyweight world title fight niadtong Dominggo, Hunyo 2, didto sa Madison Square Garden sa New York, ang pagbawos sa ila unyang rematch mao karon ang anaa sa alimpatakan ni Anthony Joshua.

Si Joshua surprisang gitumba og upat ka higayon ug gipaundang sa ikapito ka round sa dili kaayo ilado nga si Andy Ruiz ug sa wala damha nahuboan sa iyang mga titulo sa WBA, WBO, IBF ug IBO.

Hinuon, yanong giangkon ni Joshua ang maong kapildihan nga gani iya pang giagbayan si Ruiz human sa ilang awayan ug miawhag sa mga boxing fans sa pag-abiba niini.

Apan tungod sa rematch clause sa ilang kontrata, gikatakdang magsangka ang duha og balik karong Nobiyembre ug kini posibling adto na sa United Kingdom ipahigayon.

Si Ruiz maoy unang Mexican American nga nahimong world champion sa heavyweight division. (JBM)