ALANG kang Britsih star Amir Khan, mopatigbabaw si Filipino boxing icon Manny Pacquiao batok kang American Keith Thurman sa panagharong sa duha ka mga boksidor karong Hulyo 21 (RP time) sa MGM Grand Garden sa Las Vegas.

Si Khan, kinsa taodtaod na sab nga gustong makig-away kang Pacquiao apan wala mahatagi og oportunidad, midapig siya sa Pambansang Kamao sa Pilipinas gumikan kay mas daghan kining dekalidad nga mga boksidor nga gipangpilde.

Nanghinaot si Khan nga kon modaog si Pacquiao batok kang Thurman, hayan siya na ang sunod nga mahimong kontra sa bugtong 8-division world champion.

“So the Pacquiao-Thurman fight, I think I favour more towards Pacquiao. Because Pacquiao has fought better opposition, he’s got the speed and the movement,” matod ni Khan sa usa ka interbyu www.boxingscene.com.

Wala pa man tuod niya gikaharong si Pacquiao sa usa ka opisyal nga away apan dili ikalimod nga nasuweto si Khan sa abilidad sa fighting senator gumikan kay nahimo siyang sparring partner niini kaniadto.

“I favour Pacquaio because he’s been more active, and at the same time he’s been in with bigger and better opposition. I lean more towards Pacquaio, but Thurman’s got the power and the strength to hurt Pacquiao so let’s see if he can do that. I just don’t think he’ll get to Pacquiao,” dugang ni Khan. (ESL)