HUMAN ni Margielyn Didal, laing Sugboanong atleta ang mi-qualify na usab alang sa Tokyo Olympic.

Kini human nga si Elreen Ando, lumad nga taga Barangay Carreta, dakbayan sa Sugbo nakalangkat usab lingkuranan sa women's 64-kilogram division base sa continental quota nga giisyu sa International Weightlifting Federation (IWF) niadtong Sabado.

Si Ando mikolekta og 26,349,334 points nga igo na kaayong nakahaom kaniya sa ika-12 nga puwesto sa iyang division human kini nakalangkat og duha ka silver medals ug usa ka bronze sa International Weightlifting Federation (IWF) Asian Championships sa Tashkent, Uzbekistan niadtong Abril.

Ang pag-qualify ni Ando nagagumikan sa dihang ang Europe aduna nay upat ka entries sa top nine rankings.

Niini, ikauban ni Ando sa Tokyo Olympic ang laing weightlifter nga si Olympic silver medalist Hidilyn Diaz.

Gawas ni Didal (skateboarding), ang laing mga Pinoy athletes nga nakahulbot usab og lingkuranan alang sa matag upat ka tuig nga sporting competition naglakip nila ni pole vaulter EJ Obiena, gymnast Caloy Yulo, boxers Carlo Paalam, Eumir Marcial, Irish Magno, ug Nesthy Petecio, taekwondo jin Kurt Barbosa, ug rower Cris Nievarez. (JBM)