ANG Los Angeles Lakers padayon nga nanguyab ni two-time NBA MVP Giannis Antetounmpo para makuha ang iyang serbisyo taliwa sa pagpirma og higante nga kontrata sa ilang duha ka superstars.

Ang Lakers nakigsuod ngadto sa agency nga maoy nagkupot kang Giannis nga mao ang Octagon, kinsa adunay hangtod Disyembre 23 sa pagpirma sa lima ka tuig nga super maximum deal nga nagbalor og $228 milyones kun P11.4 bilyones sulod sa 60 ka buwan.

Ang Octagon maoy nagdumala sa career ni Dennis Shroder ug Wesley Matthews nga maoy gituohan sa mga eksperto nga kini maoy labing maayo nga lakang para makuha si Antetokounmpo ug makamugna og big 3 sa LA.

“The Lakers also seemed to be building a relationship with another agency in Octagon, where Giannis Antetokounmpo is partnered with Alex Saratsis and Jeff Austin,” matod pa sa tinubdan nga suhito sa panghitabo.

Niadtong tuig 2017, si Caldwell-Pope nabingwit usab sa Lakers human ang iyang Klutch Sports nga maoy ahensiya nga nagkupot niya nasuod sa LA ug dayon niabot si LeBron James sa 2018.

Gitinguha sa Lakers nga makuha ang serbisyo sa Greek Freak sanglit bisan asa kining team matapon, dako kini og ikatampo labaw na sa LA nga nagtinguha sa pagdepensa sa ilang kampyonato karon sa sunod season.

Sila si superstar duo James ug Anthony Davis bag-o rang nipirma og $85 milyones sa duha ka tuig ug $190 milyones sa mosunod nga lima ka tuig matag usa.

Gusto sa Lakers management nga madepensahan ang ilang kampyonato nga ilang nalangkat atol sa NBA bubble didto sa Florida gumikan sa presensiya sa Covid-19. (PAC)