Nasugakod sa Riga sa Latvia ang grabeng pagpanghudlat sa Antwerp sa Belgium aron langkaton ang korona pinaagi sa kulbahinam nga 21-19 nga kadaugan sa finals sa Chooks-to-Go FIBA 3x3 World Tour Cebu Masters 2022 niadtong Dominggo sa gabii, Oktubre 2, 2022 sa SM Seaside City ning dakbayan sa Sugbo.

Si Nauris Miezis maoy nahimong bayani sa Latvia human niya namugna ang ilahang katapusang pito ka mga puntos lakip na niini ang nakapadaog nga freethrow sa nahabiling 4.8 segundos.

Sa kinatibuk-an, si Miezis nipupo og 10 puntos nga igo na aron mapili siyang Most Valuable Player (MVP) sa kompetisyon.

“I think I’m born for this moment,” matod ni Miezis nga napatik sa www.abs-cbnnews.com.

Si Karlis Lasmanis nidugang og unom ka mga puntos alang sa Latvia samtang nagkumboya og lima ka mga puntos sila si Edgars Krumins ug Agnus Cavars.

“That was a tough game -- always against Antwerp,” dugang ni Miezis. “Last minute, we took our game in our hands. I’m happy that we won.”

Grabeng pagpanghudlat ang naagian sa Latvia una nila napayukbo ang Belgium.

Ang Latvia, nga maoy world No. 4, nakabulsa og $40,000 samtang ang Belgium, nga maoy world No. 3 ug top seed sa kompetisyon, nakahipos og $30,000 isip tunner-up.

Sa 14 ka teams nga ningkombati, ang usa sa mga representante sa Pilipinas nga mao ang Cebu Chooks igo lang nahiluna sa ika-10 samtang ang laing PHL team nga mao ang Manila Chooks naa ra sa ika-13 nga puwesto.