SI Lebron James sa Los Angeles Lakers nakamugna og kasaysayan human siya makakuha sa All-NBA Team recognition sa ika-16 nga higayon niadtong Huwebes, Septiyembre 17.

Ang pambato sa Lakers mao ang nag-inusarang player sa NBA nga nakadaog niini sulod sa 16 nga higayon. Iyang gibuak ang panagtabla niya sa NBA greats nga si Kareem Abdul Jabbar, Kobe Bryant ug Tim Duncan.

Mikuyog ni James sa All-NBA team karon nga season mao sila Giannis Antetokounmpo sa Milwaukee Bucks, James Harden sa Houston Rockets, Anthony Davis sa Lakers ug Luka Doncic sa Dallas Mavericks.

Si Doncic midaog sa maong pasidungog sa unang higayon. Siya ang unang sophomore player nga naapil sa All-NBA Team sukad kang Tim Duncan niadtong 1998-99 season.

Ang nasulod sa NBA Second Team mao sila Kawhi Leonard sa Los Angeles Clippers, Nikola Jokic sa Denver Nuggets, Damian Lillard sa Portland Trail Blazers, Chris Paul sa Oklahoma City Thunder ug Pascal Siakam sa Toronto Raptors. (RSC)