MIPABUTO si Paul Lee og bayanihong itsa sa katapusang 1.3 segundos aron haw-ason ang Magnolia Hotshots ngadto sa makutas nga kadaugan, 79-78, sa Game 5 niadtong Biyernes sa PBA Governors’ Cup best-of-seven finals sa Araneta Coliseum.

Ang kadaugan naghatag sa Magnolia og 3-2 nga bintaha sa series ug mosuway kini paglangkat sa kampiyonato sa Miyerkules sa Disyembre 19 sa dihang motapon sa Ynares Sports Center sa Antipolo City ang finals alang sa Game 6.

Kon moabot og Game 7 ang serya, adto kini ipahigayon sa Philippine Arena sa Bulacan.

Ang bayanihong nahimo ni Lee iyang nahimo duha ka adlaw human niya madawat ang pasidungog isip Best Player of the Conference.

Siya mitapos sa duwa nga may 11 puntos ug 10 ka rebounds ug kini unang higayon nga nakatampo siya og dako sukad sa series.

Iyang gipasalamatan si coach Chito Victolero ug ang tibuok coaching staff sa padayon nilang pagsalig kaniya bisan pa man og wa bati ang iyang napakita sukad pagsugod sa series. JBM