IBUTANG sa Golden State Warriors sa waivers ang ilang beteranong sakop nga si Shaun Livingston, taho sa ESPN.

Nagpasabot kini nga puwedeng kuhaon sa ubang teams sa National Basketball Association (NBA) si Livingston ug saw-on ang nahabiling kontrata niini sa Warriors.

Si Livingston, 34, aduna pa unta’y intensyon nga motiwas sa iyang nahabiling og usa ka tuig sa iyang kontrata sa Warriors.

Ang kanhi 4th overall pick sa Los Angeles Clippers sa 2004 NBA Draft manugpatong na sa iyang ika-16 ka mga season sa liga.

Nagduwa si Livingston sa Warriors sa miaging lima ka mga tuig diin nakakuha siya og tulo ka mga kampiyunato.

Sa miaging season, si Livingston nag-average og 4.0 puntos ug 1.8 sulod sa 64 ka mga duwa sa regular season. Mao ra gihapon kini nga mga numero ang iyang narehistro sa playoffs.

Sa 833 ka mga duwa nga iyang nasagubang sa NBA, si Livingston nagbalhinbalhin og teams nga mao ang Warriors, Clippers, Brooklyn Nets, Charlotte Hornets, Milwaukee Bucks, Cleveland Cavaliers, Washington Wizards, Oklahoma City Thunder ug Miami Heat. (AFP, ESL)