ADUNA nay bag-ong kontra ang Bol-anong si Mark Magsayo alang sa main event sa FS1 PBC Fight Night card nga ipahigayon didto sa Microsoft Theater sa Los Angeles, USA karong Oktubre 4 (PH Time).

Ang featherweight prospect nga si Magsayo makigharong kang Mexican Rigoberto Hermosillo nga maoy giilis kang American Jose Harro, kinsa mi-anunsyo sa iyang retirement pila lang ka adlaw usa ang ilang away sa Septiyembre 23.

Ang 25-anyos nga si Magsayo nangayo og suporta sa mga Filipino alang sa iyang umaabot nga away batok kang Hermosillo (11-2-1, 8KOs) kinsa nailhan nga usa ka hard-hitting fighter.

Si Magsayo nagpabiling walay pilde sulod sa 20 ka pro fights, 14 sa iyang daog pinaagi sa KO.

Nagpanikad na si Magsayo niining awaya kay lapas na sa usa ka tuig ang iyahang ulahing away diin iyang gipalubog si Panya Uthok sa iyang hometown sa Tagbilaran City niadtong Agusto 2019.

Human niadto wala na siya kaaway. Bag-ohay lang siya nakapirma og kontrata sa MP Promotions niadtong Marso ug milupad dayon didto sa Estados Unidos aron mag-training kauban si Freddie Roach sa Wild Card Boxing Gym.

Iyang away gikatakda unta niadtong Septiyembre 23 apan nasibog kini sa pag-atras ni Harro.

“Suportahan niyo ako mga kababayan. Oct. 4 sa Pinas itong laban ko. Main event po tayo,” matod ni Magsayo kinsa rated No. 4 sa World Boxing Council, No. 13 sa World Boxing Association ug No. 4 sa International Boxing Federation. (RSC)